Read more
Mukanda wa Abbe Mpoyi Mwadyamvita udi diina ne "LWENDU LWA BALUBA" kawucyena umueneka mu bibambalu bya mikanda to. Tuvwa bapeta umwe mukanda eu; ukaavu wa kale, wenda usuunsuka ; myaku mikwabu ikavu ikuupuka, minga mikole mwa kubala. Ku dyetu dimona, bantu badi bajinga mwa kubala mukanda eu mmbangi. Bwa kubasankisha mu dijinga edi, twambi ne: tudi mwa kutentula mukanda wa Abbe Mpoyi wa kala mu mukanda mupyamupya utudi mua kuleeja mu Enteleneta kudi badi baukeba.
Tudi baditatisha bwa kutentula mukanda ewu mwaku ku mwaku, mazola pa wowu, twaalata pa tootu, bwa kuneemeka mudimu muenza kudi Abbe Mpoyi. Kadi, mu ditentula dyonso mudi amu tulema kampanda tubweelelamu. Watandula bilema bidi moomu atumanyisha tubilongolola .
Muntu yoonso wabala mukanda eu ashala kuvuluka Abbe Mpoyi Mwadyamvita bwa cintu cya dikema cidii mwenza cya dilonda muendela Mwana wa Muluba Lubilanji musanga nteta, ku kale too ne mpidyewu, mu biibidilu byende ne mu ditabwija dyende dya myanda ya kabukulu ne ya Maweeja Nnangila, mu makenga ne masanka enda, mu mvita mimweela ne micimuna ; ulonda maalu onso aa mu mwakulu wa Bankambwa beetu.
Tumwelayi boonso kalumandi keetu ka manza ntente ne nsakidilu yeetu bwa mamanya a kashidi adii mutushiila.
Mutentudi
Nzubu wa Difunda Akùlà
